Láncheadúnas tiomána

Rialacha

Tá tú i dteideal iarratas a dhéanamh ar cheadúnas tiomána má:

• d'éirigh leat i dtástáil tiomána le déanaí
• Tá ceadúnas tiomána agat a rachaidh in éag taobh istigh de 3 mhí agus gur mian leat é a athnuachan
• Tá ceadúnas tiomána agat a chuaigh in éag níos lú ná deich mbliana ó shin agus gur mian leat é a athnuachan
• Tá ceadúnas tiomána agat agus gur mian leat catagóir feithiclí de bhreis a chur leis agus nach dteastaíonn tástáil tiomána
• Tá tú ag malartú ceadúnas tiomána bailí reatha a d’eisigh ballstát eile de chuid an AE/LEE nó “stát aitheanta” eile.

Braitheann an tréimhse ama dá n-eiseofar ceadúnas tiomána ar aois an iarrthóra. Tá 4 aoisghrúpa faoina dtiteann tréimhse cheadúnais.

• Má tá tú faoi 60 bliana d’aois, is féidir leat iarratas a dhéanamh ar cheadúnas 3 bliana nó ar cheadúnas 10 mbliana.
• Má tá tú níos mó ná 60 bliain d’aois, ach níos lú ná 67 mbliana d’aois, is féidir leat iarratas a dhéanamh ar cheadúnas 3 bliana nó ar cheadúnas a rachaidh in éag ar an lá sula sroicheann tú 70 bliana d’aois.
• Má tá tú os cionn 67 bliana d’aois, ach faoi 70 bliana d’aois, is féidir leat iarratas a dhéanamh ar cheadúnas 3 bliana.
• Má tá tú os cionn 70 bliana d’aois, teastóidh deimhniú oiriúnachta chun tiomána uait ó do dhochtúir chun iarratas a dhéanamh ar cheadúnas bliana nó ceadúnas trí bliana.

Má chuaigh do cheadúnas tiomána in éag 10 mbliana ó shin, ní mór duit Tástáil Teoirice Tiomána a chomhlánú. Tar éis duit do Thástáil Teoirice Tiomána a dhéanamh, ní féidir leat ach iarratas a dhéanamh ar ceadúnas tiomána foghlaimeora agus beidh ort do thástáil tiomána a dhéanamh arís.

Catagóirí Feithiclí

Tá mótarfheithiclí in Éirinn roinnte i gcatagóirí éagsúla ar mhaithe le ceadúnú tiománaithe. Is é seo an gnáthchleachtas ar fud an Aontais Eorpaigh. Tá 14 chatagóir san iomlán ag Éire, ag dul ó ghluaisrothair go feithiclí talmhaíochta. Is féidir leat tuilleadh a léamh faoi chatagóirí feithiclí agus aoiseanna íosta thiománaithe anseo.

Srianadh ar cheadúnais tiomána gluaisrothair

Tá srianadh i bhfeidhm ar cheadúnais tiomána Catagóir A. Cuireann an srianadh seo teorainn ar an sealbhóir ceadúnais do ghluaisrothair (le nó gan taobhcharr) le teorainn cumhachta de 25Kw nó níos lú. Fanann an srian seo i bhfeidhm ar feadh dhá bhliain ón uair a chríochnaíonn tú do thástáil ceadúnais tiomána gluaisrothair don chatagóir seo agus tar éis duit do cheadúnas tiomána iomlán a fháil don chatagóir seo.

Ó Mheán Fómhair 2011 ar aghaidh, tiocfaidh laghdú ar na teorainneacha um thiomáint ar meisce go dtí 20mg/100ml do dhaoine le ceadúnais foghlaimeora agus dóibh siúd atá ag tiomáint le ceadúnas iomlán sa chéad dá bhliain ó fuair siad an ceadúnas iomlán.

Tá tuilleadh faisnéise le fáil ar bhearta eile a bheartaítear ar láithreán gréasáin an Údaráis um Shábháilteacht ar Bhóithre.

Má athraím m’ainm nó mo sheoladh, an gá dom iarratas a dhéanamh ar cheadúnas tiomána nua?

Cé nach mór duit do cheadúnas tiomána a bheith leat an t-am ar fad nuair atá tú ag tiomáint, níl aon iachall ort faoin dlí do cheadúnas a athrú má athraíonn tú d’ainm nó do sheoladh. Moltar duit é sin a dhéanamh, áfach. Tá iachall ort fianaise ded’ cheadúnas a thaispeáint má iarrann An Garda Síochána ort é sin a dhéanamh, agus mar sin ba chóir faisnéis chun dáta a bheith ar do cheadúnas.

Is seirbhís saor in aisce atá i gceist chun do cheadúnas a mhalartú chun d’ainm nó do sheoladh a athrú. Tá sé saor in aisce freisin droimscríobh a bhaint de cheadúnas, catagóir a chur leis, nó botún a cheartú.

Ní mór duit foirm iarratais D.401 comhlánaithe, 2 ghrianghraf den chineál a úsáidtear do phas (agus iad sínithe ar a gcúl) agus aon dhoiciméid tacaíochta a theastaíonn, cosúil le bunchóip de theastas pósta, a sheoladh isteach. Téigh i dteagmháil le d'Oifig Mótarchánach chun tuilleadh eolais a fháil.

Cén chaoi a bhfaighim ceadúnas tiomána in áit cheann a chuaigh amú/a goideadh?

Má chuaigh do cheadúnas tiomána reatha amú, nó má goideadh é, má rinneadh damáiste dó nó má loiteadh é, ba chóir duit iarratas a dhéanamh chuig d’Oifig Mótarchánach áitiúil chun ceadúnas a fháil ina áit. Tá an ceadúnas seo ina chóip díreach de do bhuncheadúnas tiomána. Is féidir leat a fháil amach conas athchóip de cheadúnas tiomána a fháil inár ndoiciméad ar athchóip a fháil de cheadúnas tiomána Éireannach a chuaigh amú nó a goideadh.